ساعدووووني

[طيف الغلآ]

السلام عليكم ورحمة الله وبركاته

بصراحه ماني عارفه كيف أبدأ بالموضوع أحس ان مشكلتي بسيطه لكن مسببه لي أزمه
انا عمري 27 سنه وخطيبي اكبر مني بأربع سنوات
ملكتنا صارت قبل ثلآث أسابيع
مايقول لي كلآم حلو ولا يمدحني ولآ يتلهف على انه يكلمني
أيام الأسبوع ينام بدري عشان وراه دوآم وليلة الخميس وليلة الجمعه يقضيها سهر مع اصحابه يوم في البحر ويوم في الاستراحه وانا أستناه طول الليل أقول الحين يكلمني لكن للأسف :111: اذا رجع مايتصل ولا يفكر بخطيبته يحط راسه وينام

مايرسل رسايل أبدا قالوا لي ابدأي معاه بدأت بالرسايل لكن حتى مايقول لي الرسايل حلوه ولا شي واذا سألته يقول الا تعجبني بس انا ماأحب أرسل رسايل
كم مره سألته انت ليه بخيل بمشاعرك يقول مو لازم أبين لك بالكلآم أفعالي تبين

نتكلم بس من بعد صلآة المغرب نصف ساعه وكلآمه كله عادي
أحيانا أقول له فين كلمة وحشتيني يضحك يقول لو ماوحشتيني مااتصلت عليك أدري هو يبيني بس مايبين ولا يتكلم دايم أقول له ابيك تتغزل فيني يقول بعد الزوآج مو الحين مع انه شافني يوم ملكنا وعجبته مره حسيت انه انبهر بجمالي بس مابين :mad3:


مدري انا صح ولا غلط دلوني الله يخليكم :111:

[اوساكا]

كتوم !
مايعرف يعبر !
ليه ماتوصفينه بالصفات وتريحين بالك !
اذا اصابع ايدك تختلف تبين الخلق تتساوى !
مو كل خطيب لازم يسنتر عالجوال ومن كلمة حب لكلام غزل
ويمسك خط بالسوالف ولا ماتكتمل الخطبه !!
/
هذاه يقولم لو ماوحشتيني ماكلمتك
طيب واضح انه مو من النوع اللي يعبر
لكن يبين بأفعاله على ماقال !
انتي انتظري شوي الرجال توه مملك وناتبهي انتبهي تنتقدينه !!
انتبهي
انت ماتكلمني ماوحشتك
ابتعدي عن هالاسلوب !
بيني له اهتمامك لكن بطرق ثانيه وغير مباشره
والرسايل جربي انقطعي عنه صدقيني بيرجع يدورك ويفقدك !
لكن شكلك عودتيه انتي اللي ترسلين وانتي اللي تكلمين !
ف اعتمد عليك !/
..
وقبل كل ذلك سهام الليل لا تخطئ !
لا تخطئ!

وكل التوفيق والف مبروك

[شذاالروح]

اولا مبروك الملكه وبالتوفيق انشاء الله

تانيا احسن الرجل الي مايعرف يتكلم مع الحريم احسن لك صدقيني في رجال تحسين بمشاعرها من غير تعبير وبرايي افضل لان ما بيعرف يتكلم مع احده ثانيه وهذي نعمه بكره بتعرفي قيمتها

[الحقيقة139]

يجب ان تكوني مدركه لاختلاف الرجل عن المرأه
من صفات الرجل الرزين قلة الكلام , وقلة الكلام تعني بالغالب كثرة الافعال وفعاليتها
وهذا يعني ان مستقبلكم سيكون مشرقا باذن الله (وترا اللي من الرجال يكثر كلامه وبربرته تراها علامه شينه تدل على نقص عقله .

[!! عطر الحروف !!]

حياك اختي طيف

هذا مؤشر جيد لاخلاصك ولقناعتك في اشباع عاطفتك من زوجك فانتي ثروة بالنسبه له اعجبني توجهك ومصارحتك ومحاولتك الشباب في هذا السن يكابرون يحاول انه يكون قوي شخصيه لان فيه باله ان الرسايل بتنقص من قدره انصحك ان لا تبالغى كثير في الطلب ودعيه ياخذ راحته فسوف يحبك ويشتاق لك اليك فاصبري ولا تنظري نظرتك الورديه الطاغيه فالزواج هدفه سامي وتوجيه رباني كله موده ورحمه ولا نقتصره على العاطفه فالهدف من الزواج الاساسي هو نشأة اسره صحيحه وللتكاثر
واكمال نص الدين والا ستعانه على طاعة الله وليس الهدف الاكبر الرومانسيه