اختي يالغاليه

متابعه معك من البدايه

واقرا التطورات بس تبين الصدق وربي زعلت منك وعليك

زعلت منك انك خليتي سعادتك مقرونه بوجوده

ليه احد قال ان الضحكه يبيلها رجال

احد قال ان اللبس لازم يشوفه رجال

احد قال ان الفرحه بيدين رجال

لا والله ان السعاده ملكك وبين يديك

بس انت قفلتي عيونك عن كل زين الا به

اختي الغاليه

كم قصه سمعتي فيها ناس محرومين من الاولاد

كم شخص مر عليك ما يقدر يمشي

ما يقدر يتكلم

ما يقدر يشوف ما يقدر يتزوج ما يقدر يفهم وما يقدر يعبر

انتي بعقلك كتبتي وبعقلك فاهمه ان فيه ظلم وقادره تمنعين نفسك منه

زوجك صاحي مو راعي مخدرات وخرابيط ويخوفك انه ما يدخل عليك ناوي يبيعك او يبيع احد من بناه عشان قاروره ولا سيجارة ولا ابره

عيالك بخير وصحه وقادرين يكملون حياتهم صح لو انتي بغيتي

خلاص اعتبريه شخص ميت مو ضروري يتواجد بحياتك

لا تقولين الكلام سهل وربي الفعل اسهل لو بغيتي ولو احتسبتي اجر الصبر

وش يدريك يكون هاللي جاك كفاره وسبب لدخولك للجنه

احتسبي وارضي

هذا قدرك وما تقدرين تغيرينه الا اذا خربتي على غيرك وفي وضعك الخراب على عيالك

اختاري تضحين بهم والحياه قدامهم طويله ولا تضحين ببعض سعادتك والمقتصره بزوجك بس

ترى مو شرط زي ما قلت يكون هو السعاده

انتي اللي اختصرتيها عليه

ولا هو تقدرين تخلينه مكمل لها

والبسي لنفسك تعطري لنفسك اضحكي بكل صوتك لنفسك العبي مع عيالك ذاكري معاهم عيشي بهم ولهم

خلاص قولي

بلا حب بلا وجع قلب وش جانا من ورا هالحب غير الالم وغير التعب وش جاااانا

قوليها بثقه ونيه وارقصي عليها بعد

شغلتك وربي رغم ان مالها حل الا انها تظل ولا شي قدام شغلات ممكن فيه ناس بالمنتدى يعرفونها عني او عن طريقي وهي اللي غيرت قناعاتي بالسعاده

وعرفت ان السعاده احنا نصنعها ما تصنعنا وممكن تلاقينها بابسط الامور بس لاتصعبينها على حالك

ترى الدنيا مو ابو عيالك وبس !!!

وربي صدقت اغااانيج..
و كلامهاا وربي درر..

والله الدنيا دواااره..
ما تدرين بكره وش يصير...

اخترتي الطريق الصعب..

واقتنعتي ان مشكلتك مالها حل..
وهذي بداية دماارك..لنفسك وبيتك وعيالك..



وش تبين بالرضوه اذا هو مو قادر يرضيك..!!!

فكري بكلام اغانيج..
واتركي عنك اليأس..وساوس الشيطاان..

ترى النار ما تحرق الارجل واطيهااا
وهو بيعيش مبسوط ما بيهمه وش بلاك ولا علتك....!!

الله يصلحك لنفسك

آلله يعينك .. ويفرج همك ..
آنتي لأآتطلبين آلطلآق .. هذآ موب عشآنه عشآن آطفآلك
مآلهم ذنب يحسون بآلنقص آو آي شيء ..
وكل مآذآ .. آذكري ربك .. وآذكري آن بعد آلعسر يسرى
تصبري .. لك آلجنه آن ششآء آلله .. وآلدنيآ دوآرآ
وآذآ رجعتي لزوجك .. وجآء يشوف آولآده ولآ شيء .. خليك معه رسميه

وري يفرج همك ..

مشكورين على متابعتكم واهتمامكم
والله اني احب عيالي وابكي عليهم لاتفكرون اني فكرت بالطلاق ونسيتهم اهم سبب عدم اانفصالي لحد الان ااخ بس والله قهر هالدنيا الواحد لاجاب العيال وتوهق تطلع المشاكل ليتني اسكن بمدينتنا الي بيسكني فيها الشقه في مدينه بعيده بكون وحيده وهذا الي شايله همه بعد ولارحت هناك برجع للوحده والملل طيب ومصاريفي الي وراي اقساط جهازي وبعض الديون كيف اسددها لرجعت معاه وهو مابيعطيني شي برجع للتقشف معاه والله اني احاتي كيف بطالع وجهه مااقدر اناظره زي قبل
اشككركم على دعمكم المعنوي لي لكن بالله فكرو في مشاعري كانسانه مرهفة الحس تحتاج للحب والحنان لكي تشعر بالامان في هذا الزمان.

الله يعينك خيتو

وعلى طول رددي

اللهم اكفني بحلالك عن حرامك

واغنني بفضلك عمن سواك

الله يفرج همك وييسر امرك

ومن يتق الله يجعل له مخرجا ويرزقه من حيث لا يحتسب