مشكلتي مع بنتي متعبتني...

[ج ـــلــنار]

عليكم السلام ورحمة الله وبركاته


الله يحفظها ويخليها ويخليك لها يااااارب


شوفي ياغلاي معظم الأطفال عنيدين وكلنا مرت علينا هالمشكله لكن العمد على هدوء الام وطولة بالها


انا ما أقولك تسكتين لا انا أقولك من تجربه شخصيه مادامت البنت الكبيره هاديه ولو حاجه بسيطه


فبتقدرين تسيطرين على الصغيره بإذن الله ... كيف ؟؟


اذا عصبت الصغيره على شيء يخص الكبيره أو عندت الا تآخذه حاولي انك تقنعين الكبيره تتركه


بس ماتعطيها في يدها خليها تحطه قدام اختها وتروح طبعا الصغيره بتآخذه بس راح تفهم ان الكبيره مو


مهتمه وبهالطريقه ماراح تعصب وانتي بدورك عوضي الكبيره بأي حاجه وفهميها بطريقه حلوه ومشجعه

انها بنت عاقله وانها سوت اللي محد سواه يعني حسسيها بقيمة اللي هي سوته ..


بالنسبه انك تضربي الصغيره فهذا أبداً مو حل الطفل في هالسن ولين سن 5 سنوات مهما ضربتيه ماراح


يفهم ولا راح يزيده الضرب الا عناد وتبلد لكن عليك بالهدوء وحاولي انك تتكلمين معاها كأنها وحده كبيره


وتفهميها ان هذا صح وهذا غلط وخلي كلامك كله حنان وبابتسامه ولا تفكرين انها ماتفهم بالعكس تفهم


وراح تنفذ بإذن الله .... بالنسبه انها تتكلم عليك وتمد يدها اذا سوت كذا ناظري فيها بعين حاااره اذا سوتها

بس لاتتكلمين طنشيها مهما سوت حتى لو كسرت الدنيا وبيني لها انك زعلانه منها طبعا ممكن تزيد لكن


راح تتعب وراح تحاول تراضيك فإذا شفتيها خلاص تعبت احضنيها وحاولي تفهميها ماتعيدها وانها اذا ما


عادتها راح تعطينها أي حاجه انتي تعرفين انها تحبها وبكذا راح تهدأ بإذن الله وراح تحسب لهاللحظه حساب


والله ياحبيبة قلبي العناد مع الطفل مايزيده الا عناد ويظل يفشلك قدام الناس طبعاً انا ما أقول دلعيهم

لأ انا أقول تربيه وتعليم وتوجيه لأنهم يفهمون والله يفهمون لكن احنا اللي مانتكلم معهم كثير واحنا اللي


علمناهم العصبيه من عصبيتنا و تصرفاتنا معاهم ..


انتي جربي طريقتي لفتره مو يوم والا يومين لأ يبي لك وقت وان شا ءالله راح تجنين ثمره طيبه


والله يعينك على تربيتهم ويصلح لنا ولك العطاء يااااارب

[ابيض القلب]

حياك اختي وكلنا نعاني من هذه المشكله - والمرأه اكثر تحملاً من الرجل في بيتها وفي تربية ابنائها فكوني

لهم قلباًحنوناً وأماًصالحه’ومربيه

الله يعطيك الصبر وطولة البال ويرزقك الذريه الصالحه

[أغ ـــانيج]

آآآآآخ يالحصنيه

عندنا وعندك خير

بس نصيحه لله الضرب والله ما يجيب لك الا عقد لها اول ما لها آخر

من تجربتي واللي احتجت فيها اخصائيين في التربيه لأن العايله عندنا منقسمين

ناس يقولون دلعتيها وناس يقولون عقدتيها

فاضطريت اتصل على مشروع الشيخ ابن باز رحمه الله الخيري لحل المشكلات الاسريه

طبعا ما فكرت بهالوسيله الا بعد ما يأست من الحلول وظليت في بيتي قرابة السنه على اساس ارتاح من الاحراجات قدام الناس

شوفي وش قالي وقسما بالله انو صااااااااااادق

قالي يا طويلة العمر ان الطفل تتكون شخصيته خلال الخمس سنوات الاولى من عمره وعليها تتبلور شخصيته في المستقبل

يعني يا أنك صنعتي من هالطفل شخص سوي وناجح يا شخص منحرف وفااااااشل

تخيلي اننا احنا من يصنع مستقبلهم

قلت طيب وش اسوي قال لي شيلي الضرب من قاموسك نهائيا ووقفي ابوها وفهميه هالموضوع ابدا لا يضرب هالنقطه عانيت منها كثير زوجي عصبي واتعبني كثر ما اتعبتني بس الحمدلله وصلت معاه للي ابيه

طيب كيف الطريقه

قال لي التشجيع فقط الحرمان بدري عليه

شوفي الشي اللي تحبه واعطيها في البدايه حتى لو مو صدق بس حسسيها انك حبيتي شغله منها

بنتي كانت تحب الصور اللي في ابو ريالين ورود وحيوانات ورسومات

اخذت فلين وقلت لها فيه عصفوره تشوفك اذا ما سويتي غلط وتحط لك على هالسبوره هدايا

اروح احطها لها وارجع اناديها وافرحها شوفتي اليوم عشان ما ضربتي احد شوفي حطت لك ورده كبيره

وهي تستانس وتنادي ابوها وجداتها وخالاتها اذا جو توريهم تقول شوفو العصفوره عشان انا شاطره حطتلي صوره

واحيانا وردتين واحيانا صور كرتونيه اللي تحبها

واذا سوت غلط احط ورده صغيره او صوره ما تحبها واقول عشانك سويتي كذا حطت لك هذي

وعند الناس اخذ لها دفتر صغير والوان شمعيه واقعد ارسم لها واقول هذا ايش مثلا تليفون او دبدوب او سياره

يعني شغلات هي تفهمها وبرضه بعض الحروف والارقام كبرت وبرضه جات لها اخت وانا مستمره على هالشغله

بنتي كانت اصغر من بنتك

ومشى معاها الاسلوب هذا وفي فتره بسيطه تعدلت 180 درجه طبعا حاولي تخففين خروج من البيت عشان تقدرين عليها

ودائما شاركي اختها معاها تستاهل يا عمري تدلع

الكل كانوا يسألوني كيف تغيرت وربي كانوا الكل يأذوني بكلامهم عنها لدرجه فيه شخص من العايله كان يسميها شارون تتخيلين؟؟؟ عشانها كانت تضرب الطفال زي ما تنضرب
شوفي الالم اللي كنت احس به

الحين عندي ثلاث كلهم ما شاء الله ذكاء وفطنه والله انهم مميزات في العايله التجربه كانت في الكبيره واللي بعدها

تميزو بدراستهم واخلاقهم وذكائهم وروحهم ما شاء الله تبارك الله

وبقولك على شي يمكن يضحكك تدرين ان الكبار اللي عليهم تم تنفيذ التجربه مهووسات بالرسم وتجميع الصور الكبيره عندها ثلاث ملفات صور اقسم لك بالله

وفي الرسم ما تتخيلين رووووووووووووعه وبرضه يحبون يكتبون اشياء من تأليفهم رسايل لي ولأبوهم ولجداتهم ولوحات رسم والكبيره قبل كم يوم توريني كاتبه قصة ذات الرداء الاحمر بأسلوبها يجنن

عندي صندوق مليان برسومات وكتابات لهم واتوقع يكونون في يوم من الايام في احد هالاختصاصين

انا احب هالشي من صغري وما كنت عارفه ان هالحلم ممكن احققه في بناتي

عندي في المطبخ معلقه لهم لوحه رسومها وكتبوا فيها كلام جنان لي ولأبوهم اول يوم برمضان علقتها والى يومك ما زالت موجوده

كان فيه وحده قبلها بس شلتها هذي احلى

عرفت اني اقدر اسوي منهم مبدعات بدل الضرب والسب

وهذي تجربتي اتمنى تفيدك

[اميره بكلمتي]

ماشاء الله تبارك الله يا غنووو الله يخليهم لك يارب وتحقق احلامك ...
وانتي يا الجصينه جربي هالتجربه المميزه .
وان شاء الله يهدي بنتك وتشوفيها باحسن حال ..

[الحصنيه]

هلا بك اختي اميره الله يسعدك دنيا واخره

فعلا والله العصبيه تعلموها مني وانا اعترف لانه مرت علي ايام كنت مضغوووطه جدا وكنت اعصب كثييير عليهم...

ان شاءالله بطوّل بالي والله يعين وبسوّي زي ماقلتي اصلا انا هالاسلوب اميره كنت متبعته مع الكبيره سبحان الله كنت اتكلم معاها زي الكبار واللي ساعدني انها هاديه ..بس مع الصغيره !!!الله يصلحها

شاكره لك اختي لا خلا ولاعدم ...