لكل اب وأم تفضل واعطنا من خبرتك في اسلوبك مع اطفالك

[اميره بكلمتي]

الله يسعدك يااغانيج
انا سويت الجدول فتره ومررره نجح ...بس نسيته وكسلت
بس انا العيب فيني احيانا اذا سمعتهم في خصام او احد يقول ماما بصوت عالي ابكي
مو طبعي ولا عادتي .
بالعكس دايم مسيطره على الوضع
بس مدري احس باحباط
بس يمكن ظروفي اليومين هذي عصبيه وماا حب اقسى عليهم احب ابعد عنهم اذا عصبت .
ويمكن ضعفي
صار واضح عندهم فاستغلوه وصار كل واحد يقوى على الثاني

[وحشتني الذكريات]

غنوج فديت راسك
اي والله صادقه

انا ادري اني ضالمه واعترف فيهـآآ
بس وش اسوي والله انا قليله صبر ولا اتحمل شي على طوول اعصب ولا اعرف اعمل كنترول لنفسي ..
يعني لو مره احاول امسك نفسي صديقني ان شاءلله اتعود على الصبر ..

<< تدرين عااااد نعمه من رب العالمين الصبر ..
وانا ربي مااا رزقني الصبر ابدن ابدن

حنووووووونه واحبه موووووت بس في لحظه غضب اخرب كل شي ...
العب معاه ونسهر انا وياه على البلاستيشن فللللللللللله << ككككككك << هي للحين طفله مو بس ولدهااا

هههههههههههههههههههههههاي

بس ممكن لاني ماعندي خبره في التعامل مع الاطفال لانو انا بنفسي ماعشت مع اطفال .. طول عمري انا الطفله الوحيده اللي عايشه مع اهلي
مو مثل اللي متعوده على اخوان واخوات اصغر منهااا وتعرف شلون تتعامل << صحيح مافي شي يجي من الخلا

كلهااااا بالتعليم والخبره

نواف مقطع قلبي / اولا لانه وحيد
ثانيااا لانه منبووذ من بقيه الاطفال << لانه اكبر مشكلجي واناني ... وراعي ضرب ومضروب
علشان كذا بقيه الاطفال مايحبون يلعبون معاه
مرات نصير انا وابوه الاطفال ونعلب ونحوووس معاه في غرفته
حتى بالصلصال نلعب وكل واحد يسوي شكل
بس كلهاااااا ماتعجبه ..

ويقولي ماما روووحي

انا ابغى فلان وفلان وفلانه << ويعدد لي قاائمه بأسماء الاطفال ..
وياحرام محد يلتفت له ..

وربي اكتب لكم وانا حزنانه على النوفي

وبعض الاوقات اطفال الناس اللي اكبر منه بالجسم يكفخوووون فيه ويلعنون خيره
وهوو مثل البسه يجيني يبكي ... والله العظيم مره
كان ولده عمه ضاارب نواف على عينه بقاروره الببسي القزاز وربي عينه ورمت وصار لوونهااا ازرق << يعني لو انعمى ولدي ..وش بيفيدني ولد فلان ..

ياقلبي عليه والمشكله ولد عمه اكبر منه بالجسم والعمر << يعني في فرعون الله واكبر عليه

قسم بالله بغيت انزل له واصنه كف على وجه واخليهااا خريطه في جبهته .

بس حشمه لزوجي وابوه مااابي امد يدي عليه
<< بس صدقوني لو ضربه مره ثانيه مااراح احشم احد راح اخذ حق ولدي بيدي .. واعلى مااافي خيلهم يركبون <<< عصبت تراااا

هههههههههههههههههههههههههههههاي

شفتو شلون من كلام عصبت .. اجل شلون هناااا في بيتي وعلى نوافي ..

ااااااااااااااه الله يفكني من العصبيه وضيقة الخلق اللي جابت لي السكر والضغط ..

موضوعك يااغنووج خلاني افضفض واقووول لكم
Help please

[نـآآآيـف]

السلام عليكم

الله يجزآك الجنه يآ اخت اغانيج ويجزى كل من شآركـ في هذا الموضوع الحساس والمهم في تربية فلذآت اكبادنآ



كلنا يعرف بأن التربيه الطيبه والحسنه هي امانه
فما بلنا إذا كنا نرجيوندعو الله التوفيق بأن نربي ابنائنا على النهج الصحيح وانا متأكد بأنالأب والأم يجتهدون ويبذلون كل مافي وسعهم بمستقبل باهر وطيب مبني على اسسالدين والأخلاق الحميده وطموح المستقبل بالمكانه العاليه في المجتمع لأطفالهم



عن تجربتي عندي ولد وبنت الله يصلحم ويهديهم
كآكآ(مبارك) عمره 6 سنوات و7 شهور
رورو(اروى) 3 سنوات

انا ابغى اقولكم مشكله قد يغفل عنها الكثير منا
وانا اول من غفل عنها ليس نسيان مني وانما متساهلها لأني لم اجرب معاناتها
،،

المشكله ولدي خجول حييييل واذا احد رفع صوته عليه مايبكي يكتم في صدرهـ هذي بحد ذاتها مصيبهـ
خصوصا انه في بداية حياته،، وحساس ،،
عيال اخواني كذا واحد في سن ولدي وطبعا نجتمع فيالمناسبات وبعض الأوقات
المهم فيه اكبر اخواني الله يجزاه كل خير وادعيله ليلونهار لأنه صحاني من غلطه كانت تعزل ولدي نهائيا وتحطمه نفسيا في حياته


سألني قبل سنه تقريبا قال احس ولدك يستحي وخجول حيييل ومايحب يلعب معالأطفال وماشاالله عليه دقق حتى في نظرات ولدي يقول حتى نظراته لهم غريبهيعني وده يلعب معهم بس الولد حياوي بقوهـالحياء حلو بس له حدود

قلت والله عجزت عنه احكي معه وكلش اقوله ودي يلعب ويضرب وينظرب ويتعود مع البزران بس زي ماتشوفياعندنا ياعند امه

قال الحل اللي ودي الكل يقراهـ لأننا وربي نغفل عنه كثير


لازم تجيبه معك يوميا وتخليه يتعود مع البزران
طبعا لنا جلسه بعد صلاة العصر يوميا إلا ماقل عند جدي الله يشفيه
وقال لأخواني وعيال خواتي وعيال عمامي جيبو عيالكم معاكم وانت يقصدني اذا اتقهويت رح لاتجلس
قلتاخاف يزعجكم يبكي قال روح وماعليك
اخوي ماشاالله ملتزم وعلى وشك التقاعد منالتدريس
المهم
اخليه عندهم لحد صلاة العشاء واجيبه طبعا اول اسبوع مايبغى يروح معي بس اذ شغلت الموتر اقوله نبغى البقاله وينسى ههههه ويركب الحمدلله


بعد اسبوعين قال عمي لاتجيبه ولاتطري اي شيء يمكن هو يقول تأخرنا على جدي عشان الشله

اقسم بالله الذي لاإله إلا هو صار منهم وفيهم ولايصبر وكل يوم غاثني بالبزران يبغى يفلها كوره وبلايستيشن و و

اهم شيء صار اجتماعي والحمدلله يعني خفيت ماأجيبه شريت له بلايستيشن وصار هو يعزمهم طبعا عزيمة بزران باونتي وجلكسي
بس بدون اندومي الحمدلله على النعمه





هذا الكلام قبل تسعه اشهر تقريبا
المهم
السنه هذي درس ولله الحمد صحيح اول اسبوع عانيت بس الحمدلله اتأقلم مع ولد عمه في الفصل



صحيح فصلت هذه المشكله
ولكن ابغى اوصلكم او اختم بسؤال مهم وحساس وخطير يختصر كل ماقلت


السؤال
لو واعوذ بالله من كلمة لو
مبارك لازال على طبعه يعني قبل ينبهني اخوي الله يجزاه خير
كيف تكون معاناة المدرسه معي قبل تكون معاناة مع مبارك عشان يدرس لأني متأكد مليون % انها معاناة وشفتها بعيني وربي اول اسبوع من الدراسه ولحد الحين بعض الآبآء مستمر كل صباح يصف طابور عشان يرتاح الولد
واغلب الأطفال تصير عنده عقده مدى الحياة من المدرسه والمدرس وهذا اكبر غلط منا نحن الأب والأم


وللمعلوميه يمكن الروضه تعود الطفل بس احيانا تنقلب ضده

&&


اما البنات
مايعرف يربيهم إلا امهاتهم
اسأل ان يحلنا من وآلدينآ
وان يصلح لنا النيه والذريه ،،

&&

العذر منكم على عدم ترتيب الموضوع

وعذرا على الآطاله

[♡ sαяσиα]

ماشاء الله تبارك الله.. اخووي ناايف..

اعجبني تعااونك.. انت واخوك لحل المشكله..
لان فعلا الانسان يمكن الحل يكوون قداام عينه لكنه ينعمي بانشغاله....
وتجااهل..للمشكله ..
ااو لانه لحاله ما يقدر يسوي شي..
يحتاج احد ينصحه..
الله يجزاه خيير..اخوووك..ويكثر من امثااله

الف شكر لك على النصيحه



غنووو..ذكرتيني ببنتي الكبيره
ماشا ءالله تبارك الله بنتك مهتمه بصلاتها..الله يحفظها ياارب.ويصلحها لك..
وانا ..لازم اقولهاا ولازم اذكرها ما تتذكر من حاالها..
كل شي يلهيها..ولا ما تكره الصلاه عادي تحب تصلي..

نفسي انها من حالها تسويهاا..


الله يعطيكم العااافيه جمييعا..

[أغ ـــانيج]

اخوي نايف

شاكره لك تواجدك اللي نور المتصفح وأثرى الموضوع بتجربتك الرائعه

ما شاء الله تبارك الله

يعجبني الاخوان اللي قلوبهم على بعض

اخوك حس بولدك كأنه ولده

وعطاك الحل من واقع خبرته

وما شاء الله حله رهييييييييب ويسر

بس فعلا احيانا الحلول قدام عيوننا وما ننتبه لها

اشكر لك مرورك وياليت تفيدنا دوووم بالحلول لبعض المشكلات

يعافيك اخوي