والله يا أخواتي البارح انا حاولت فوق 3 أو 4 مرات أدق عليهم

بس المشكله مايردون علي وفي الأخير قفلوا الجوال

كلمة زوجة الوالد علشان تكلمهم نفس الشي مايردون عليها وبعدها قفلوا الجوال

أرسلت لها رساله بمناسبة السنه الجديده لكن برضوا كالمعتاد سيتم المسح

وهم على موعدهم إنو البارح بيردوا علينا ويعطونا شروطهم لكن لا حياة لمن تنادي

ربكم يكتب اللي فيه الخير بس



طيب تصدقون وتآمنون بالله يا أخوات إني البارح وانا أصلي العشا في المسجد

سمعت صوت ولدي ينادي يقول ( بابا ) قبل مانسجد السجده الأخيره

وربي بكيت وانا ساجد إلين حسيت روحي بتطلع


والله العظيم بعض الأحيان إن لم يكن أغلب الأحيان إني أقوم من نومي أسمع

ولدي ينادينين ( بابا ) ويبكي


والله بعض الأحيان وانا جالس أتفرج في التلفزيون إحس بصوته يلعب في البيت

أطلع للصاله وكالمعتاد أقول لنفسي وش فيك أنجنيت مافيه أحد


يا ناس وربي بديت أحس إن بيجيني جنان شوي وأستخف من كثر اللي أشوفه





وش أسوي معاهم قولوا لي

فتى زهران


الله يهدي سركم انت وزوجتك



فتى زهران

أنا قريت كل ماكتبت

وقريت ردود الأخوة الأعضاء

فاستنتجت من ذلك

أولا ً:

ترى زوجتك تبي ترجع لك بس مافيه شروط

هذا على مااعتقد دلع من العائلة كاملة

مو من زوجتك بس


انا اخوي حصلت لي نفس مشكلتك السنة اللي راحت

وكان عندي دورة لمدة شهر ونص خارج منطقة عملي

وخليت زوجتي عند أهلها واحنا سمن على عسل

بعد يومين رجعت من الدوام ونمت ولمن صحيت وجدت مايقارب العشر مكالمات

من الوالد حفظه الله

و من اثنين من اخواني

ومن ابو زوجتي

حسيت فيه شي

اتصلت على الوالد وقلت وش السالفة؟

قال انت وش فيه بينك وبين زوجتك قلت مافيه شي

قال لا انا اتصل علي ابو زوجتك يقول ويقول ويقول

انا بررت موقفي أمام الوالد قال يصير خير وقفلت من عنده

اتصلت على زوجتي حصلت الجوال مغلق

اتصلت مرة ومرتين وثلاث مافيه فايدة

واعتقد بعد يومين اتصلت وردت علي

تكلمت معاها عن المشكلة

قالت انا ماارجع الا لين تجي انت وابوك عند ابوية وتوافق على شروطي

قلت خير ان شاءالله

ولااخفيك ان عندي ولد منها

المهم

ابوها اتصل على ابوي وانا مافكرت حتى اني ادق عليه

قال تجيني انت والولد وارحامك كلهم وعيالك

اتصل علي الوالد قالي وش رايك؟

قلت الراي رايك

لكن انا اشوف اني اخصرهم لين اخلص الدورة هذي واجي ونتفاهم

مع ان المسافة ماهي بعيدة حدود 200 كيلو

خليتهم شهر على نار لا أكلمهم ولا ارد عليهم

يوم جيت بعد شهر والله مااكذب عليك

جيت انا واخوي وابوي

جلسنا تقهوينا وكيف الحال طيبين

المهم نبغى البنت

دخل جوا قال للبنت جهزي نفسك

جاني ابو البنت قال روح كلم زوجتك

بعدها اخذت حرمتي ومشيت

ابوها كان يقول لزوجتي ليش زوجك مايتصل علي

ابيه يدق علي يكلمني ليش مطنشني

المستفاد من الموضوع:

خلك ثقيل طنشهم لا تتصل ولا تسأل

لا تحاول ترسل لزوجتك ولا لأبوها

بالعربي خلك ثقيل

والله شهر بالكثير وهم يتصلون عليك



اسأل مجرب

اعذرني على الإطالة

والله يعينك اخوي

يا يتيم الاحبااب..
طفشنا واحنا نقوله طنشهم..
ومو رااضي الا انه يبين لهم انه بينهبل ؟؟
مقطعهم اتصالات..ومرسل يعايد؟؟
وما يبيهم .. يلعبون عليه..!!

تعبنا معااه صرااحه..
لكن راح نظل ندعيله ..
والله ييسر الحاال..

فية زوجات كذ الله المستعان

هههههههههههههههههههههههههههههههههههههه


من جد حسيت ان قائدة قوات الحب عصبت

الله يرج سموكم يا دبه


وربي اللي يشوفني وانا اضحك في الدوام يقول ذا انخبل وش يضحك عليه




-----------------------

أخوي يتيم الحب

فديت خشتك يا دب

أنا في الشهر الأول طنشتهم ولا كلمت ولا قلت وين أنتم زي ماسوت انت بالتمام

وبعد الشهر روحت انا والوالد عشان نرجعها عيت تقول ابيه يطلقني وش اسوي فيهم

ما ادري والله وش أسوي

طنشت ورجعت للشرقيه ولا كأن شي صار حاولت أني أتناسى الموضوع لكن

ما قدرت ياخي عيالي دايم في ذهني

ما أدري وش سويت لهم عشان يسوون كذا


-----------------

أختي قائدة قوات الحب

والله يا غاليتي ما أدري وش أقول لك

أنا مشكتلي إني ( صدااااق ) يعني أصدق أي شي

هي تحلف من هنا انها كانت بترجع

وأبوها يقول البنت ماهي راضيه ترجع

ما أدري أصدق مين والا مين

يختي فيه مثل دايم في بالي ( الجمره ماتحرق الا رجل واطيها )

الوالد الأسبوع اللي راح شوي وأتضارب أنا واياه كل شوي يطلع لي بكلمه

بس قلت له لو تفقد واحد من عيالك ذاك الوقت بتحس بفرقاه

على طووول طردني من البيت

يا أختي والله ثم والله لا عاد يهنا لي نوم

ولا يهنا لي أكل

ولا يهنا لي جلسه

أنا أجلس أسبوع في الشرقيه واروح الرياض يومين وربي كأني جالس على نار

جلستي بالشرقيه أحسها أحسن أبعد عن أهلي وعن المشاكل اللي يسببوها لي

أقعد عند التلفزيون لكن والله العقل مو مع التلفزيون

عقلي يبعد عني 1500 كيلو

أفكر .. أفكر .. أفكر

ما أدري عن نفسي الا إذا دق الجوال أو جرس الباب

غير كذا الله يخلف



---------------

أختي بنت أجاويد

والله فيه أخس من كذا لكن مشكانا لله عز وجل


أعذروني لكن يعلم الله وحده إني ما أحصل أحد أشكي له همومي غيركم

اذا روحت عند أهلي ما أحد يسمع لي

إذا روحت عند صديق ما يسمع مني

لمين أروح

مالي الا الله ثم أنتم



اللهم إنك قلت وقولك الحق ( أدعوني أستجب لكم )

وقلت ( أمن يجيب المضطر إذا دعاه ويكشف السوء )

اللهم إني أقسمت عليك بكل خير أن تجمع بيني وبين زوجتي وأبنائي يا جامع يوسف بأبيه





آسف مره أخرى لكم جميعا