بسم الله الرحمن الرحيم

السلام عليكم ورحمة الله وبركاته

أسعد الله أوقاتكم بكل خير

أضع بين أيديكم هذه القصيدة

وأتمنى أن تنال أعجابكم



البا رحـة ذَبّلـت بقلبـي رياحيـن
ضَمّيْت على فرقاك يـوم انتحيتـي

خلى اليباس أوراقها تبكـي الليـن
قسى عليها الوقت يومـك قسيتـي

أتذكرك بخطـاك وأنتـي تهاديـن
كن السحـاب يسابقـك لا مشيتـي

ويميل مع خصرك رقيق الفساتيـن
أذا وقفتـي مــال وألا انثنيـتـي

خصرٍ نحيل ٍ لمّتـه قبضـة يديـن
لولا الضلوع أن كان قلت اختفيتـي

في عاتقك يقصر طويـل النجاديـن
ويضفي جديلك للدروب إن سريتي

وفي محجر عيونك نهار وسواديـن
الليل وهمـوم الغـرام إن جفيتـي

ويسيل في قلبي من الحب نهريـن
الشوق والذكرى إذا لـي طريتـي

ويطير لك لـابتسمت العين للعيـن
كل الفراش اللي بصـدري وبيتـي

يا أجمل من أعذار الخطأ للمحبيـن
وارق نسمات الحديـث إن حكيتـي

تدرين ليه أنتي بقلبي إلـى الحيـن
وليه بخيالي باقيـة مـا انمحيتـي

لأنك عرفتي بطيبتك كيـف تبديـن
ولأنك رحلتي بطيب يـوم انتهيتـي

يا أحلى سنين العمر وأغلى العناوين
يا نور مصباحي ومشكـاة زيتـي

أتذكـرك والنـاس ماهـم بداريـن
وأتذكـرك لا قلـت ليتـي وليتـي

جيتي أو انه غيبـك نـازح البيـن
منساك أنا يا بعـد حيـي وميتـي