خلاص ابرحل عن حياتك ودنياك
خلاص ابمحي قصتك من حياتي

كانت الم واحزان من يوم لقياك
عز الله اني ذقت فيها المماتي

اوهمتني بالحب يازين وياك
وخليت عيني ماتذوق المباتي

اسهر طوال الليل كله لعيناك
واصيح باعلى الصوت لك ياغناتي

كنت احسبنك دنيتي لاعدمناك
تبقى بجنبي لين حزة وفاتي

وكنت احسبنك نبع ماينقطع ماك
اجلس على جالك ارطب لهاتي

وكنت اشوف النور لاحل طرياك
اجلس اتم تم بك وتعجز شفاتي

وليه ياقلباً على الصد مااقواك
قتلتني حطمت كل امنياتي

اسقيتني علقم وكل الغلا جاك
من قلب صافي يعشقك يامناتي

لكن تدري اليوم والله عفناك
ابغاك تسمعها وهذي وصاتي

خلاص ابرحل ياعذولي كرهناك
خلاص بمحي قصتك من حياتي