عهدي بهآ / قدآم تلبس عبايه
وأنا / بعد قبل ألبس شمآغ وعقال ...!!




طفلين نتهجّى حروف القرآيه
الله يا / مجمل .. سوآليف الأطفآل ...!!




كانت هنا في كل شارع حكاية
وكنا / نقول علوم ماهي بتنقآل ......!!




وكنت أتقآسم مامعاها .. معايه
من عسكريم التوت لـ العلك أبو ريال .!!




وكانت بعكسي شاطرة بـ القرآيه
تقرأ جزء عم م وطه / والأنفال ........!!




وأنا لك الله من مواري غبايه
مدري أبو نقطه هو / الذآل أو الدال ..؟؟



وكانت لأبويه تشتكي من شقآيه
وتعلـّمه ... كيف أربط الباب بحبال ....؟؟



ياما على ظهري كسر من عصايه
يقول لي ( خلك وأنا أبوك رجال ) ....!!




وأمي تقول ( أدع لولدك الهدايه )
خوفي يصيبه كثرة الضرب .. بهبال ..!!




لآ شفتها مع أول الدرب / جايه
مدري أنا اللي ملت وإلا الوطى مال .؟؟




أحس قلبي يرتجف في حشايه
ماكنه إلا الضيف ... لآ هز فنجال .....!!



ياما عن السعلي تخبـّت ورايه
لآ خوفـّوها فيه / ثم شافت ظلآل ....!!




تقول ( خلك يامحمد معايه )
وأستانس ألعب عندها دور الأبطال .!!




وأغار حتى من عيون أصدقايه
لآ طالعوها ..... قلت تكفون ياعيال ..!!
.